Во рамки на овогодинешната кампања, по повод одбележувањето на 17-ти декември, Меѓународниот ден за стоп на насилството врз сексуалните работници, СТАР- Првиот колектив на сексуални работници на Балканот, заедно со ХОПС – Опции за здрав живот Скопје, и со нашите поддржувачи и активисти по 16-ти пат марширавме со црвени чадори во центарот на Скопје, и одбележавме 5353 денови до правда – кампања посветена на конечната правда за сексуалните работници по пресудата на Европскиот суд за човекови права Д.Х. и други против Северна Македонија.
Маршот традиционално започна на платото пред Спомен куќата на Мајка Тереза и заврши на плоштадот Филип II. Пред да започне маршот, претставници на СТАР и ХОПС, како и три претставнички на нашата заедница дадоа изјави за медиумите:
„Сексуалните работници во земјава не уживаат посебни права, тие едноставно треба да ги уживаат сите права коишто ги имаат сите луѓе во земјава. Како организација кога ќе мапираме или идентификуваме одреден прекршување на правата ги застапуваме сексуалните работници пред надлежните институции.” – Борче Божинов, претседател на СТАР-СТАР.
“Денеска го одбележуваме Меѓународниот ден за стоп врз насилството врз сексуланите работници, 17-ти декември кој го одбележуваме секоја година со маршот на црвените чадори. Она што е поразлично од претходните години е што оваа година одбележуваме 5353 денови до правда. Оваа година сексуалните работнички конечно остварија правда поради прекршување на нивните права од страна на институциите.” – Хајди Штерјова Симоновиќ, извршна директорка на ХОПС.
„Нè држеа цела вечер во најнехумани услови, нè навредуваа, но правдата конечно е задоволена“ – сексуална работничка.
Маршот на црвените чадори беше следен и медиумски покриен со присуство на национални и локални телевизии кои ни дадоа поддршка на настанот преку нивните медиумски прилози и видео снимки од пресот и маршот во централните вести и на Интернет порталите. Во прилог неколку линкови од медиумски прилози:
https://kanal5.com.mk/marsh-na-crvenite-chadori-vo-skopje/a616504
Во прилог ви пренесуваме дел од атмосферата во центарот на Скопје преку фотографиите на Ванчо Џамбаски од 16-тиот Марш на црвените чадори одржан на 15.12.2023: https://www.flickr.com/photos/fosim/albums/72177720313409353/
Спроведувањето на кампањата по повод обележувањето на 17-ти декември – Меѓународниот ден за стоп на насилството врз сексуалните работници е поддржано од фондацијата Red Umbrella Fund.