Во срцето на оваа моќна уметничка акција, стојат три автомобили со црвено светло во нивната внатрешност. Прозорците се замаглени, покриени со капки вода и испишани со срца, отпечатоци од дланки и пораки: „Задното седиште не е место за насилство“, „Гушкај ме“, „СТОП на насилството“ и „И сексуалната работа е работа“, како повик за солидарност, разбирање и поддршка на нашата заедница во борбата против насилството и стигмата.
Приказната зад „Тивки Црвени Соби“
Зад замаглените прозорци, овие автомобили раскажуваат тивки, но моќни приказни – приказни на ранливост и отфрленост. Задното седиште се трансформира во простор на интимност, но и опасност, што претставува симбол на животите на сексуалните работници кои живеат на маргините на општеството, честопати игнорирани и осудувани.
Оваа уметничка акција ја отвора вратата кон невидливото, кон животите кои заслужуваат да бидат препознаени и почитувани. Со неа повикуваме на дијалог и свесност за насилството и стигмата што сексуалните работници секојдневно ги трпат.
Пораката што ја испраќаме
„Тивки Црвени Соби“ е креативен повик за разбирање и поддршка на сексуалните работници во земјава. Преку уметничкиот перформанс, визуелната интервенција и ангажирањето на јавноста, оваа иницијатива има за цел:
- Да ја подигне јавната свест за препознавање и прифаќање на сексуалната работа како секоја друга професија.
- Да поттикне емпатија наместо предрасуди.
- Да го запре насилството и стигмата врз сексуалните работници.
- Да испрати порака дека секој живот, секој избор и секој глас е вреден.
Погледни низ замаглените прозорци.
Ова е повик за акција – да ја размаглиме тишината, да го прекинеме насилството и да создадеме простор за достоинство и почит кон сите.
Визуелната интервенција и уметничкиот перформанс го спроведовме во рамки на кампањата за стоп на насилството врз сексуалните работници, поддржан од фондацијата Red Umbrella Fund, а во соработка со TransFormA.