Во пресрет на одбележувањето на 2-ри јуни – Меѓународниот ден на сексуалните работници, СТАР – Прв колектив на сексуални работници на Балканот, во текот на месец јуни 2024 година ќе спроведе дигитална видео кампања насловена „Сексуалните работници се спротивставуваат на дезинформациите“, која има за цел да придонесе за намалување на дезинформациите во врска со сексуалната работа и сексуалните работници, кои се присутни на социјалните медиуми во Северна Македонија.
Сексуалните работници како маргинализирана заедница често се мета на дезинформации кои поттикнуваат говор на омраза и онлајн насилство и оваа кампања претставува мобилизација на заедницата кон намалување на проблемот со дезинформациите во дигиталниот простор. За време на дигиталната видео кампања во текот на месец јуни ќе бидат промовирани 5 кратки видеа (shorts) на социјалните медиуми со цел да се создадат позитивни наративи за овие теми помеѓу корисниците на социјалните медиуми во РСМ и да се намалат постоечките негативни и штетни наративи за најстарата професија во светот.
На долг рок, кампањата придонесува кон стратешки важна цел за заедницата на сексуалните работници, а тоа е поттикнување позитивна јавна дебата за декриминализација на сексуалната работа, како единствена политика која ќе обезбеди почитување на човековите права и слободи на сексуалните работници во едно демократско и праведно општество.
Оваа видео кампања е подготвена од страна на Здружението за поддршка на маргинализирани работници СТАР-СТАР Скопје во рамките на проектот „Сексуалните работници се спротивставуваат на дезинформациите во Северна Македонија“, поддржан од Програмата за дигитален активизам на TechSoup Global.