Навистина ми е мило што постојат трансродови луѓе кои знаат кои се од самиот почеток, од моментот кога биле многу млади. Јас едноставно не сум дел од нив.
Како дете, искрено не мислев многу на родот. Од време на време се чувствував збунето околу тоа зошто постојат различни родови идентитети – но во мојот ум, се доживував поинаку од мојот постар брат, така што имало моменти кога се чувствуваа оние наметнати очекувања.
Како некој што се бори со ментална болест од најрана возраст, моите тинејџерски години беа навистина тешки, во голема мера дефинирани со сложена траума и опсесивно-компулсивно нарушување. Немав прилика да размислувам за мојот пол и родов идентитет, верувајќи дека никогаш нема да добијам одобрување од надворешната околина.
Се сеќавам во тоа време дека одев кај момчето, велејќи му дека размислувам да го променам стилот на облекување. Оваа можност конечно да се отворам ме возбуди, но тој тоа го отфрли. “Не мислам дека би те привлекувал повеќе од сега”, објасни тој. “Мислам дека твојата женственост е она што те прави атрактивна”.
Стравот дека би можела да бидам отфрлена од најблиските, направи моето родово прашање да го потиснам до најтемниот дел од мојот ум.
Пораснав во заштитена средина. Мојот свет беше многу мал. И додека некои трансродови луѓе веднаш и интуитивно знаат кои се, јас поминав многу години живот во кој ми беше кажано како треба да живеам. Мојот начин на справување со траумите беше отсликан од очекувањата што ги имаа луѓето од мене, со надеж дека ќе избегнам понатамошно зло. Колку повеќе се трудев да се вклопам, толку позаштитено се чувствував.
Не треба да нe’ изненади фактот што толку многу луѓе полесно го потиснуваат својот родов идентитет отколку да го прифатат. За транс луѓе кои се чувствуваат небезбедно, потребна им е поддршка. На многумина од нас сè уште ни недостигаат модели, информации и безбедност, кои ни се потребни да продолжиме напред.
Потиснувањето на желбата да се изрази родот претставува една форма на самозаштита. Барем оваа дефиниција важеше за мене.
Мојот живот конечно се промени кога запознав уште една трансродова личност додека студирав. Откако ја запознав, пронајдов храброст да почнам да го истражувам сопствениот тело.
Семејството и пријателите кои долго време ме познаваа беа шокирани. Јас навистина не знаев што да кажам, освен да им одговорам со: “Еј, и јас сум изненадена”.
И навистина бев изненадена. Со секој чекор од мојата транзиција, мислев дека правам некаква грешка. Нели требаше да го сфатам ова порано? Дали можеби ова е само една чудна фаза? Зошто сега? Зошто ова?
Но, со секоја промена – облека, хормони и неодамна, операција – станав посреќна, посигурна и самоуверена личност. Јазлите што беа во мојот стомак толку долго колку што можев да се сетам, исчезнаа; мојата социјална анксиозност и страв почнаа да се топат. Најдов внатрешен мир што никогаш порано не сум го почуствувала.
Знам многу луѓе кои исто како мене се изненадени да бидат трансродови. И зошто да не бидеме? Општеството ни кажува на илјадници различни начини дека транс луѓето се ретки необичности, ужасни грешки или, уште полошо, дека воопшто не постојат.
Пред неколку недели, направив операција за промена на полот. Кога влегов во операционата сала си помислив: “Зарем сериозно го правам ова?” Знаев дека ова е она што ми требаше, а сепак бев се уште исплашена, но знаев дека морам да издржам. Сепак, кога се разбудив, олеснувањето што го чувствував беше повеќе од очигледно. Мојата прва мисла беше: “Зошто не го направив ова пред десет години?”
На некои од нас им требаат години, дури и децении да се пронајдат себеси. Се уште се прашувам каков би бил мојот процес на транзиција доколку живеев во едно поотворено и охрабрувачко општество. Мислам дека во тој случај реализацијата на тоа што сум јас вистински би се случила многу порано.
За сега, сепак, наоѓам некоја утеха во создавањето простор за транс луѓето да бидат изненадени од самите себеси. Навистина не е чудно да бидеме шокирани, особено во едно општество кое често ги испитува транс-луѓето и нивните родови идентитети пред да ги прифати.
На крајот, иако трансродовоста знае да биде изненадувачка и збунувачка, сепак тоа не го менува фактот која сум јас. Всушност, тоа е едно од најдобрите изненадувања што ми го има дадено мојот живот.