„ХИВ И РОД“ – Барања и потреби на трансродовите луѓе во однос на ХИВ превенција во Р.С. Македонија

„ХИВ И РОД“ претставува документ кој е изработен од самата заедница на трансродови лица во Република Северна Македонија, по утврдување на потребите и проблемите на трансродовите луѓе.

СТАР – Првиот колектив на сексуални работници на Балканот во соработка со неформалната иницијатива за заштита и унапредување на правата на трансродовите лица во Република Северна Македонија – ТрансФормА спроведе истражување за потребите на трансродовите луѓе преку организирање онлајн фокус група со учество на 8 трансродови лица. На оваа онлајн средба се дискутираше за нивните потреби и проблеми во врска со прашања поврзани со ХИВ и пристапот до социјални, правни и здравствени услуги во Република Северна Македонија, според претходно утврден прашалник. Од добиената анализа од истражувањето се изработи документ „ХИВ и РОД“ – документ за барањата и потребите на трансродовите луѓе во однос на ХИВ превенција во Р.С. Македонија.

Овој документ беше презентиран пред членови на Платформата за одржливост на ХИВ сервиси, Националната ХИВ комисија, како и пред граѓански организации кои спроведуваат програми за ХИВ превенција помеѓу сексуални работници, вклучувајќи ги трансродовите лица.

Во прилог се дел од барањата на трансродовите луѓе во рамките на документ:

– Државата да работи на правно признавање на родот на трансродовите лица.

– Државата треба да работи во насока на имплементација и спроведување на анти-дискриминаторски закони.

– Креаторите на политики, парламентарците и други лидери од јавниот здравствен сектор треба да работат заедно со организациите од граѓанското општество и да вложат напори да се мониторира стигмата, да се конфронтира дискриминацијата против клучните популации во кои спаѓаат и трансродовите лица.

– Неопходно е да се потенцира адекватното снабдување со кондоми и лубриканти за трансродовите жени и трансродовите мажи кои имаат секс со мажи преку услугите на граѓанските организации.

– Лесен пристап до ПрЕП како дополнителна интервенција во пакетот за сеопфатна ХИВ превенција за трансродовите жени, а особено за трансродовите луѓе кои имаат секс со машки партнери и оние кои се во врска со партнер кој има поинаков статус.

– Трансродовите луѓе треба да имаат еднаков пристап до нега и третман за ХИВ како и сите други популации.

Целиот документ со барањата на трансродовите луѓе „ХИВ И РОД“ може да го прочитате/преземете на следниов ЛИНК.

Овој документ со аргументирани барања на трансродовите луѓе е поддржан од EKHN, во рамки на програмата за грантови „Род и ХИВ“.